ABWAAN HAADRAAWI

MAANSADA SIRTA NOLOSHA.

SIRTA NOLOSHA :waa maanso aad u qiimo badan oo si togan uga hadlaysa dhinayo badan oo nolosha aadanaha ah sida Aqoonta , Qiyanka , Akhlaaqda, Nolosha, Halganka, iyo Dhaqanka iyo Waano dhinacwalba taabanaysa waxana qofka akhristaa ka faa’idayaa talooyin aad u qiimo badan, waxana uu abwaanku ku hal-qabsanayaa gabadh uu dhalay saaxiibkiis oo la yidhaa SAHRA RASHIID SH. CABDILAAHI.  Waxay ay odhanaysaa sidan….

Saaxiibkayoow heedhe 

Safar baan ka imi dheere

Marka hore salaan diiran

Marka xiga samoow heedhe

Ha ka nixin sin-dalagtayda

Sacab fara-madhnaantayda

Suugaanta yaabkeeda

Salka iyo fadhaa keena

Marka xiga sugnaanteeda

Socodkiyo falkaa sheega

Saaxiibkayoow heedhe

Amba saaka qaybteeda

Sirsiraan ka joogaaye

Xadhigiyo bal eeg suunka

Iyo sabarka gaadiiday

Iyo salabka ii qaadhan

Iyo suudha guudkayga

Hilaygiyo waxaan saabka

U gilgilay samoow haanta

Subag inay ku dhiiqdaaye

Saasay ku badisaaye

Sannad waliba xeeshiiye

Kol hadday siloonaato

Samaheedu waa dhiige

Subuc talada loo dhiibye

Sida sida sidaas weeye

Si la yeeli jiray weeye

Marka xiga samoow heedhe 

Talo sibiq dhaqaaqeeda

Soof-daran haboowgeeda

Sal-fudaydka hoogiisa

Bal salaankan fuul laalan

Iyo sagabtan heensaysan

Dhulka saas u jeedaali

Sidan iyo sidaas fiiri

Sidan iyo gadaal dheeho

Raqda solan lafaa soogan

Bal su’aal u celi maydkan

Sababtuu u go’ay raadi

Bal dhegayso seylaanka 

Iyo salawga beer-qaadka

Iyo sebiga yeedhiisa

Waxaad maqashay oo saasaa

Maxaad odhan lahayd suudi

Samalaho furfuridooda

Godka seer-mawaydaanka

Marka ay sabuux gaadho

Si kalaan u dhigi taasi

Saaxiibkay waayaale

Suurtuu dhalaay heedhe

Waxaan adiga kuu saantay

Dadka kaaga soo soocday

Sahra kuugu yeedh-yeedhay

Siduu aabahaa heedhee

Sama ii faraan heedhee

Kuu siinayaa heedhe

Sooyaalka taariikhdu

Iyadaan sal-guurayne

Murtidaan sahraay heedhe

Sadar kuugu qorayaaye

Heedhee sahraay heedhe

Curad suubbaneey heedhe

Summadii rashiid yeelo

Iyo weynidii saado

Iyo sawracii hooyo

Sinjigii hablaa geeska

Subaxdii indhaha kuulo

Tintu saqaftu yay waayin

Iyo diibka loo saaro

Subko oo xayaabayso

Korka siigo yay taaban

Ku ilaali saabuunta

Dharku siifad yuu yeelan

Suyac iyo bar gaasheysan

Ku ilaali saahoodka 

Garashadu sahraay ruuxa

Sed u gaara weeyaane

Haduu saamigaas yeeshay

Qurux ma leh saluuggeedu

Dadku siigga dida maaha

Sogob iyo ri’wayn maaha

Sumal iyo laxdiis maaha

Rati iyo sabeen maaha

Falka iyo sugnaantiisa

Socodkiyo abbaartiisa

Dhaqan sida xishoodkiisa

Dabar iyo silsilad haysa

Iyo suun ma dhaafaan ah

Wuxu soofka xoolahaba

Kaga soocan yahay weeye

Waxan uga socdaa heedhe

Naftu seeto yay waayin

Hana falin sidaad doonto

Hadalkana sar weedhiisa

Una saaf qofkii waaya

Ka tegin sarbeebtiisa

Hana gelin sursuur oodan

Hana lumin sargoyntiisa

Hana liqin sangaabtiisa

Ha ku saxan badheedhkiisa

Runta sogordoh haw yeelin

Ha suul-daarin doodiisa

Sisibaa wadaagiisa

Sababee abbaartaada

Hana badin su’aashiisa

Sarifkiyo tilmaantiisa

Sedex eray halkii dooni

Sodon yaanay kaa qaadaan

Sidi-qabaxi yay raacin

Sare haw dhig-dhigin luuqda

Gacantana ha saydh saydhin

Hana odhan wax sawliila

Heedhee sahraay heedhe

Sarta hilibka dheehaaga

Samaydaada dhererkaaga 

Sarajooga muuqaaga 

Sanqaroorka jaahaaga

Dahab iyo xariir saan

Uma baahna saantaadu 

Hada silis ha xidhan maaha

Luquntana ha sudhin maaha

Waxan uga socdaa heedhe

Marka aad sunuud hayso

Waxa suuq mug-wayn yaalla

Ha la simin kitaab weeye

Hurdo iyo sahraay jiifka

Marka hore sariir raadi

Salli iyo furaash dayday

Sadexdaba hadaad waydo 

Lama seexan kari waayo

Hadda saantu qodax maaha

Suugaantu gogol weeye

Nin ka qaday sahraay tiisa

Hadduu seed liqliqiddeeda

Ku saruurad goyn waayo

Subag iyo baruur doono

Siduu jecelyahaa been ah

Dhadhan iyo sibraar kayda

Siddig caanaheedaa leh

Badar iyo sareen shiidan

Iyo sixin ku iidaaman

Wax la cuno sabiibaa ah

Nin samaystay baa faan leh

Waxaad haysataa saas ah

Ka sokow intaan sheegay

Hadda soortu dacar maaha

Dharku saadhi qudha maaha 

Saylooni garan maaha

Iyo sabarandaa giiran

Mana aha sulwaal biid ah

Hadaan saarku kuu diidin

Sadex-qaydu ceeb maaha

Heedhee sahraay heedhe

Sar daruuran oo maasa

Mara abu sarmaantiiya

Dhacle baarka loo seesay

Boqor wada siyaakhaysan 

Sildiyaal jiljila dhiibsan

Tusbax dhawr sagaal laab ah

Iyo qool sunaar dheehan 

Subeeciyad xiddiyo laaf leh

Adigoo siddeeddaas hal

Iyo timaha oo soohan

Ku darsaday sifaha guudka 

Garashiyo sariig sheegtay

Sinta bidix ka laafyooday

Ma qofkaa sitaa jooga

Hadda salamadhloow gaabi

Ha ku jabin saqlaha waalan

Sallow ololka hooy jooji

Ha saloolan xayndaabka

Ha ku bixin saloognaanta

Ha sariiran waayeelka

Sakatiga ka daa beesha

Saha iyo af-kala qaadka

Ha ka nixin hiddaa suuban

Gabdhayahoow sidee waayee

Ilbaxnimadu saas maaha

Hadba suuf karkaro maaha

Sararaha banee maaha

Qor qor suuniyaha maaha

Dhabanada sibaaq maaha

Sanka oo la mudo maaha

Sarkhad iyo xashiish maaha

Sawir iyo riyaaq maaha

Filin iyo sarcaad maaha

Saxan reer-galbeed maaha

Kabo sookal dheer maaha 

Suuriyo durduro maaha

Silsiloow cid kale maaha

Qof siloon ku dayo maaha

Wax sawaaban noqo maaha

Sinta iyo lafaha duudka 

Seddex jeer jejebi maaha

Soomaali diid maaha 

Sidaad doonto yeel maaha

Dhulka oo ku sidi waaya

Samadoo la koro maaha

Xiliyada wax saareenka 

Iyo saacadaha reeban 

Sabadiyo rugtay joogtay 

Gabadh timi ma saalloona

Ku saliya rasuulkiina (scw).

Salka dhiga guryaha seexda

Sunsun falan siddeha fayda

Sati fudud salaan sheegan

Indha suhub af geed saarrey

Hadba surin ka sheekeeya

Sidan iyo sibaas yeela

Erayada saluugoo dhan 

Kuma lihid sahray meela

Adigiyo intii seeran

Inta saahidee dhowran

Inta gabadh sidaadaas ah

Uma socoto weedhaydu

Sumbo iyo maraadaa leh

Inta sibiq dhaqaaqdaa leh

Sagan daaqa jiitaa leh 

Inta marinka seegtaa leh

Waxba aan sugayn baa leh

Inta sharafta saydhaa keh

Suuraafta maqan baa leh 

Xadhig lama sitaan baa leh

Saca faarsa nacay baa leh

Barni sumal-xadkeedaa leh

Heedhee sahraay heedhe

Suugaantu iib maaha

Eray iyo sunee maaha

Hugun iyo sitaad maaha

Siddi iyo i daya maaha

Sali ugu ducee maaha

Ku caleemo saar maaha 

Sulan reer ku cay maaha

Sadho iyo xajiin maaha

Laba saaq ku gado maaha

Waxan saylad gelin weeye

Sahdi iyo dareen weeye

Bulsho saasaheed weeye

Samaheeda mudan weeye

Sawmeeda diga weeye

Sacabkeeda kulul weeye

Sahan iyo tilmaan weeye

Dhaxal soo jireen weeye

Wax ku saabsan meel weeye

So’da iyo ka guro dhuuxa

Heedhee sahraay heedhe

Sirta noloshu xoog maaha

Dhagar iyo suryee maaha

Surma seegto deden maaha

Sibqi iyo hunguri maaha

Sacab iyo ka leef maaha

Sukhrad iyo fal-xumo maaha

Hadba seeb u rogo maaha

Salfo iyo ku faan maaha

Damac iyo sandaho maaha

Darajiyo sandalo maaha

Saro iyo dhalaal maaha 

Sidan iyo sidaas maaha

Hadda sadadu lacag maaha

Heedhee sahraay heedhe

Bulsho saami loo tuurtay

Shan siyood wax loo yeelay

Samir inay xigtaan maaha

Surka inay dhigtaan maaha

Sas inay didaan maaha

Inay suudalaan maaha

Sardho inay galaan maaha

Sixir inay dirtaan maaha

Inay kala saftaan maaha

Nin i sugayayoow heedhe

Anigoo ku sugay heedhe 

Maxaad ii sugtaa heedhe

Heedhee sahraay heedhe

Marka haadu socod dayso

Dhirta sare tukuu fuulo

Gorayadu sanqadho reebto

Adna soonka xidho maaha

Mugdi talada sii maaha

Berri iyo siday doonto

Sug cadceeda maqan maaha

Saqda dhexe habeen soocan

Mugdi simay adduunkeena

Wax siraata noqo weeye

Heedhee sahraay heedhe 

Saranseerka jiilaalka

Surbacaadka jaahweynta

Sumal-haadka roob waaga

Iyo solanka daaduunka

Cirka oo sabaad guuray

Dhulka oo huwaday siigo

Iyo dogobo soogsoogan

Marka beladu sooyaanto

Saadaashu beenoowdo

Saca kululi kaa leexdo

Adna sabanka raac maaha

Inaan sabadu duugoobin

Sayax iyo ugbaad waayin

Sudda iyo degaankaagu

Surmi iyo haraad yeelan

Ama saacu guur-guurin

Sohda ceelku dheeraanin

Adaa yeeli kara saasba 

Heeshee sahraay heedhe

Saxariirka aafaadka 

Saxallada kal-meerkooda

Sambabkuba col weeyaane

Marka sayno loo iisho

Ama soofku jaan qaado

Ushu way sabooshaaye

Ha ku dagan sidsidideeda

Qalinka wax suureeya 

Kugu sima halkaad doono

Saxiib kal-furan weeye

Sunto fara ku hayntiisa 

Weligaa ha sii daynin

Sisin iyo ku beer muufo

Iyo laanta saytuunka

Ku qotomi sugnaan waarta

Iyo nabada seeskeeda

Samo iyo ku doon heedhe

Dunidiyo sinaanteeda

Ku dawee sawaaceenka 

Iyo siica daacuunka

Ku burburi sarbaa mooska 

Iyo soohdimaa meersan

Ku midee samuud raaca 

Midabada la sooc soocay

Dadkan toban saamood leh

Weligaa ha tumin seefo 

Iyo sabaradaha mawdka

Nin ku siin karaa haysta

Boqor iyo suldaan baa leh

Sanco yahan gaboobaa leh

Sahankaynu diranaa leh

Kaynu wada sugaynaa leh

Nin sokeeyeheena leh

Samoow aabeheen geediyo

Hooyadeen suuban

Seddexdooda wiil heedhe

Ninka ugu sed-roon baa leh

Ugu socod horeeyaa leh

Ninka sida xilkeenaa leh

Ka sarjara heddeenaa leh

Salab ciidu hayn wayday

Xidigaha ka sudhay baa leh

Nin sabuul la aayaysto

Dhulka siib ku ridin baa leh

Nin sahraay adduunkeena 

Saacad gubi karaa haysata

Ninka sigay kun jeer baa leh

Waxa nolosha saameeya

Sako nin ka bixin baa leh

Qofka saawa-saawaysan

Santi nimaan ku furan baa leh

Nin aqoonta soorkeeda

Sida kale u rogay baa leh

Ninka saadka maadhiinka

Ugu roon daboolkaa leh

Nin samaa ku adag baa leh

Nin ku filan sal-guurkaa leh

Sannadkaynu caydhoownay

Kaynu suus ka waynaa leh

Naftu waa sir xeel-dheere 

Nimaan suubin karin baa leh

Wedka qudha sameeyaa leh

Sula iyo xanuunkeeda

Shalay iyo sadaadeeda

Iyo saawihii hooga 

Naxdintii badhbaa suuxsan

Selelkii badh baa waashay

Dad sawaaban baa buuxa

Dumar waayey saygooda 

Hangashii sidaa muuqda

Ololkii badh baan seexan

Sarihii dumaa jiifa

Qabrigii sinmaa jeexan 

Waxa saaka joogow ah

Salabkii horaa tuuran

Surrad baa i guud taalla

Samadiyo dhulkaa buuxa

Baddu waa sakalo miidhan

Qalab suruc leh ba laalan

Sanqadhuhu hub kacay weeye

Sabarkii dadkaa baahan

Saantii dadkaa qaawaan

Weli talo ma saaloona 

Waxa soo socdaa yaab leh

Wershad suufiyaa daaran

Waxay soo sidaa geeri

Belo aan fan seeraarka

Saxar loo mar-marin weeye

Waxan ahay qof cayn saaban

Deldelaad u sudhan jeebka

Alloow yaa suureeya

Salka dunida yaa dhawra

Iyo seeska jiritaanka

Wacanaa san-saankeedu

Badanaa sudaaddeedu

Saxanaa hanaankeedu

Allow yaan sugnaanteeda

Saymiyo u rogin duullan

Subax noolba dhiig daata

Xadhig iyo silsilad shiilan

Alloow yaan sinnaanteeda

Ku beddelin saraar oodan

Iyo seere wiil qaytay

Dadka saaran guudkeeda

Yaan ka dhigin sabool qaawan

Iyo soobir caydh jooga 

Eray sami wuxuu gooyo 

Allow yaan ku jarin soodhka

Garashada ka dhigan seefo

Allow yaa su’aashaasi

Sida ay u tahay yeela

Heedhee sahraay heedhe

Dhulka iyo wixii saaran

Sare iyo wixii laalan

Inta sudan intii seeman

Waxa jira sir iyo caadba

Rabbi qudha sax weedhiisa

Sida uu ku yidhi buuxi

Waxa hadhay salkiyo baarka

Inta sool qarsoon joogta

Inta seek xidh-xidhan jiifta

Inta saydha waabeyda

Maroodiga sidaa dheer leh

Wiyil iyo sahboodkeeda

Inta laga subxaanaysto

Kolay tahay libaax sayn leh

Marka aad sahraay meel fog

Uga suul-dhabaalayso

Deg-deg inay sujuuddaada

Suxullada dhigtaan weeye

Sidashada awooddaasi

Sahal iyo wax fudud maaha

Qofba waa si garadkiisa

Heedhee sahraay heedhe

Badda iyo sulaaqeeda

Iyo buurta saynsaaban

Onkodkiyo sawaxankiisa

Salowgiyo jibaadkiisa

Danabkiyo sal-salihiisa

Sarka dhabanka duufaanka

Ha ka didin sawaxankiisa

Duni kuu sakhiran weeye 

Sayid baad u tahay caana

Suubaali oo layli

Ku sasabo aqoontaada 

Senge  iyo ka dhigo dooni

Sallo iyo ka dhigo oori

Gabadh weeye caad saaran

Badi saayiraadeeda

Iyo laab-salaaxeeda 

Guro saadka guudkeeda 

Iyo sahayda uurkeeda

Kordhi noole soorkeeda

Iyo baahi soorkeeda

Hubi nabad sugnaanteeda

Iyo sabo negaanteeda

Ha ku deyin xanuun saaqa

Ha ku badin saqaaf ciidan

Suluf iyo calaad waarta

Ha ku saaxin naabaalka

Iyo sukhulo naareedka

Ha ku didin sabbeeyaanka

Sabareynka bood-booda 

Ha la dhicin sawaariikhda

Iyo saanadaha miigan

Ha sumayn macaankeeda

Salabaha ha marin dooga 

Ha burburin sansaankeeda

Quruxdiyo sureerkeeda

Ha sadhayn hagoogteeda

Sagalkiyo daruurteeda

Ha sukuumin uunkeeda

Saryankiyo ugaadheeda

Ha fur-furin sin-dadabteeda

Ha ka rogin dul-saarkeeda 

Udubada ha siibsiibin

Ha afuufin suurkeeda

Subax qudha ha duuduubin

Sakaraadka taaheeda 

Uga xilo samaanteeda 

Sacabkiyo mashxaradeeda

Garashadu mid soofaysa 

Ha ka dhigin sadqaynteeda

Ha ku solo wanaageedu

Ku sin inan dumaalkeeda

Kuwa saadanbee laalan

Heedhee sahraay heedhe

Saban tagay xusuustiisa

Raad-raaca siinleeyda

Socod barashadii dooda

Saxarliyo abbaarteeda

Anigaan wax saaraynin

Sannad iyo garaadkiisa

Saadaashu been weeye

Waxba samir ma liileeyo

Ha sarwicin qof kaa jeeda

Hana sugin qof kaa maarmay

Hana sigan mar mooyaane

Nin ku siray ha faalaynin

Sababaha ha waydiinin

Ha u seeto dheeraynin

Sibiq iyo ku qabo baydo

Hana falin siduu yeelay

Nin ku yidhi anaa saasa

Sida uu ku yidhi heedha

Hadii ay siniin waydo

Ama sarin sanaan waydo

Waxa furan sidaas maaha

Qof saluugay maankiisa

Ama suufay muuqiisa

Ka sal-kacay xaqiiqdiisa

Qabku saami ladha maaha

Nin sitaba bar baa saaran

Nin ka sii sitaa jooga 

Ragganimada sooceeda 

Adigoo sagaal buuxshay

Hal ku seegay baa yaalla 

Sogotiga qof tegayaa leh

Si haday u dhici waydo

Si kalaa u waan-waan ah

Dunidaa sidaas yeesha

Sooryana qof yimi baa leh

Nin salaad u kacay oogan

Sahwi galay xalaakeeye

Adna sahanka beel loogan

Ha ka dhigin socdaal baada

In halkii sal hayn waayo

Laga sabo rogtaa doora

In su’aal jawaabteed leh

Lala sara-kacaa fiican

Qof ku yidhi sinanmayno

Adna buri sarrayntiisa

Sedka waad wadaagtaane

Ma sagaashan baa tiisu

Selelkana hurdaa keenta

Hana seexan goor baas leh

Han sareedo loo waayey 

In saraayo loo daayo

Sida aan u idhi weeye

Belo saacadeed joogta

Sabti nabada haw riixin

Subax dhalatay caadkeeda

Ha ka bogan wax-saarkeeda

Adiguba samee maanta

Beritaba sargoo heedhe

Noloshaba inaad saafto

Qaabayso saabkeeda 

Waxan suuro gelin maaha

Garashiyo sugnaan hoyso

Falka sami ha kuu raaco

Mana jiro sed kaa baaqday

Ilbaxnimadu saas weeye 

Sirta noloshu taas weeye.

……..DHAMAAD………

Leave a Reply